ألوف

ورجعت هالصورة مره ثانية ، مع إنو كان باعتقادي نهاية السنة الماضية إنها ماراح ترجع .. بس رجعت ومعها أشياء ثانية ،

ما كنت أعتقد سنة ثالث بتكون بهالضغط مو بس الدراسي حتى النفسي ،

تعريفي بشعور سنة ثالث إيش ؟

شعور إن الأيام تركض ونحس إن بكرا راح نتخرج ، مضغوطين من الخوف والرعب ، ما نبي شي يضيع من يدينا ما نبي نحس بالضغط بنفس الوقت ،

بقد ما احنا مستعجلين نبي نعرف مصيرنا في القياس والجامعة ونتخرج ونفتك قد ما نبي نطول بالقعدة في المدرسة من الخوف من هالمصير  والخوف من العالم الجامعي الكبير،

حتى تصوري عن بنات ثالث ،ما أحسه يركب علينا ، مدري إن كانوا الثانين يشوفننا زي ما كنت أشوف .. !

ما أحس إنو تحمسنا لازم نجيب معدل مع إن نظامنا يعتمد ع التراكمي ، مدري ليه جانا فأول السنة تبلد و أكثرهم أنا .. يمكن اقوم بالواجب .. بس ماراح تصدقوني إن ألوف الي يضيق صدرها عشان الـ 1/2 في الدوري صرت أنقص ع 3 أو أكثر وأكمل حياتي طبيعي ولا كأن صار شي .. بس الحمدلله بديت أحس على نفسي وقررت إن الدورة الثانية للإختبارت الدورية راح أجيب الي علي والباقي على ربي .. : )

من الهواجيس الي جتني إذا طالعت الأدبي وهم مبسوطين ، وتحسونهم جايين يلعبون أتحسف إني دخلت علمي ، مع إني ماشيه فيه تمام الحمدلله بس من الخوف إني فرضاً ما انقبلت في المكان الي أبيه ، أتحسف على سنتين كرف وتعب بس لمن أتذكر إني أنا أبي هذا الشي يعني أبيه ، وإن شا الله ربي ما راح يخيبني ولا يخيب صديقاتي ..

أحس إني فخورة بنفسي على هالجهاد :] خصوصاً إن الأدبي الأعزاء جيرانا ..  فأحس إني أجاهد هالمنظر صدق :] -> : /

صارت سوالف حلوة بهالكم شهر .. بما إن مكاني تغير وصرت ورا وجنب لميا .. فهات يا سواليف وياضحك ، وهواجيس بعد .. :] -> يا ليل الهواجيس seko

ما صار عندي مشكله مع الدريشة الي تطل ع الدور الـ 3 وأقعد أراقب الرايح والجاي من الفضوة ، لأن القعدة ورا مالهاش مثيل .. أقعد أحل واجباتي ,وأرتب فايلاتي وأجهز الكتب الي بدخلها في اللوكر ، وأسولف .. وكلش ، بس قررت بالكيمياء إني أركز أو أحاول ، أو إني أروح قدام ..

ياربي إني من الفضوة أعد كم مره أ. البيئة تقول ” النفط ” قالتها فوق 21 مره -> بسم الله عليك :]

بما إني جبت طاري هالمادة .. أحب أقولكم هالمادة جميييلة جداً جداً ، كلها من واقع حياتنا ، تعرفون إيش التلوث بمعناه الحقيقي .. تدركون قد إيش هو خطير خطير .. فيه ناس ماخذه إن التلوث يعني ” زباله ” وانتو بكرامه ودخان مصانع  وهي أوسع من كذا بكثيييييير ! و أضرارها كثيرة .. مادة تخليك تتفاعلين غصب ،

 بدت هالمادة تأثر على حياتي الصدقية ، خصوصاً بعد مشروع الـ global warming ” الإحتباس الحراري ” سووه قروبين من فصلنا وفصل ع 2 فبما إن المشروع مشترك فأكيد المشروع كان قوي ومؤثر ، حضره كل ثالث أدبي وعلمي .. مع إني شفت أفلام أثرت فيني زي Home وغيره ، بس غير التأثير لمن تشوف مجموعة كبيرة من الناس واعين و بنفس عمرك و يحملون نفس الفكر ،

نفسي يدرجون هالمادة لكل المراحل ولكل الأنظمة

فكرة المشاريع مره حلوة ، بس لو كانت من غير ضغط وبترتيب ونستفيد منها كان تصير أحلى ، مع إننا استفدنا من بعضها .. والحلو فيها إنها هيئتنا للجامعة  : )،

أحلى مشروع سويناه أنا وقروبي بمادة الإدارية عن ” الدومينو “  ولا تهون المشاريع الباقية طبعاً :$

بس هالمشروع الي أحسه أمتع شي ، سوو البنات دومينو خاصة فينا فبيت وحده مننا ، للأسف ما حضرت جاني ظرف وما جيت مع إني كان نفسي أسوي شي زي كذا ،

عاد ما قصروا صوروها فيديو شكلها وهي تطيح وتعبوا تعب .. بما إنها يبيلها دقة فضيعة ، سوو على شكل قلب عشاني :$ -> برا

وعلى شكل لولبي .. وشكراً لله إن التجربة نجحت ..

طبعاً كان مصاحب للعرض قصة الدومينو وكيف نشأت وأين ، وصاحبها فيديوات ثانية عن يوم الدومينو وغيره .. وجبنا شوكلاتة دومينو

سوينا بالبيئة عن التلوث الغذائي وكان مررره مفيد مع إننا صدمنا البنات بالمطاعم وكبف إنها تلوث الأكل ، وبنسلم مشروعنا الكيمياء عن الكحول قريباً إن شا الله ،

عن هالمشروع ” الكحول ” -> اسم جذاب ولا .. : P

يوم قسمنا الشغل .. تحمست إني أمسك العينات ، فكرة إني أسوي كحول كانت مررره عاجبتني .. -> فيس يتخيلني وأنا ماسكة واحد سيكو

دورت بقوقول ما لقيت .. ، يوم سألنا الأستاذه يعني كيف عينات هل نسوي زي الصدقي ، أو نفس الي ف الكتاب .. قالت لااااا ->  روعناها مسكينه : $

قالت إن التجربة الي فالكتاب بغلط بسيط يسبب إنفجار ، تخيلوا عاد ..!

فصارت العينات إن بعض الأدوية والكريمات والمسحات الطبية فيها كحول .. هذي هي العينات .. يا خسارة : / ، -> للحين بنفسها تسويه

أشياء كثيرة حلوة فهالترم .. وإن شا الله ربي يوفقنا ويسهل علينا ويرزقنا درجات ترفع الراس يارب وانتو بعد ادعوا لنا عشان ترتفع معنوياتنا ، تراها كثير ما تصير في الحضيض خصوصاً هاليومين .. :/

* سؤال للي عندهم معرفة بالكليات الصحية أو الطبية بشكل عام ، هل الفيزياء بيدخل بأي شكل من الأشكال .. يعني بيصير شي مهم مثل الكيمياء و الأحياء ؟

لأنهم نزلوا مادة حرة فيزياء 4 للترم الثاني إذا أحد يبي و يقولون بتنفعكم بالكليات الصحية بس أنا ما اقتنعت .. فوش تقولون ؟

by ~Myrtillis

وبدينا آخر سنة من الثنوي .. عسى الله يطرح فيها البركة ويسهلها : )

كان اليوم الأول يوم لطيف و خفيف أحسن من السنة الي فاتت ، مع إنو ما فيه طوابير أو تنظيم ع طول قالوا ثالث فوق وأشروا ع السيب الي فصولنا فيه ورقينا ،

الفصول ما تغيرت ولا البنات .. حتى المجموعات ظلت بمكانها الأصلي الي عند الباب والي بالوسط ،

 حتى البنات ما غيروا أماكنهم في وسط مجموعاتهم حاسين نفسهم أمس جايين المدرسة وما أمداهم يفكرون هل بيغرون ولا لا ،

أنا كـ العادة نفس مكاني ما تغير من أولى  ع الطرف وجنب صديقي المفضل الباب ، ظهري للجدار ووجهي للبنات ؛ لزوم الإشراف على أمور الرعية  ،                               

والحمدلله مو نفس كل سنة غبار وحساسية وحالة ..  كان الغبار خفيف فـ الحساسية صارت خفيفة مره : )

 نزلت لنا 5 مواد حلوة : كيمياء3 – فيزياء 3 – رياضيات 4 – علوم إدارية – علم بيئة ، كلهم تحريري إلا الإدارية تقييم ، فـ يصير فهالحالة عندي حصتين فراغ اقترحوا وش أسوي بالحصة الثانية ؟ -> إذا لقيتوني بالفصل

صارت أشياء جديدة بالنظام شي يونس وش مو مره يونس ، مثلاً ما فيه اختبارات نصفية زي كل ترم ،

مره حسافة كانت مفيدة الوحده تقدر تقيم نفسها بالمادة من خلال هـ الإمتحان إذا  إجتازته طاح هم النهائي – إن شاء الله – : ( ،

نزلت بداله خانة مشروع وخانة بحث زي حقين الجامعة ، تقول المديرة راح تستمتعون : P  لعل وعسى ..

الشي الي يونس .. إن المواد الإختيارية صارت إجبارية ع الدفع الي ورانا ، يعني إحنا ناجين من هـ القرار ، أحسن يستاهلون – استغفر الله – الترم الي راح مدلعين وأي شي يطرا عليهم يقدمون شكوى ، واحنا الله أعلم بحالنا ..  : (

صراحةً ما أحسني متحمسة أدرس ، أو أخطط لشي لصالح الدراسة ، أحسني ما قعدت وقت كافي عشان أشتاق للدراسة ..

بس إن شاء الله هـ السنة ماراح أخلي معاناة السنة الي فاتت تنعاد ،                                                                                                                                                     

والي يبيها تنعاد من الفصل تحت شعار ” مصلحتنا “  ،

وهم ما يدرون وين ربي حاطهم هم عشان يعرفون وين مصلحتهم   ،                                                                              

فـ شسمه الي يبي الضغط ودروس التقوية يخليها لنفسه ولا ترى ما ترى ترى ..  

 هـ الأيام هذي راح تمر مثل الدقايق بسرعة بتخلص .. من جد من يصدق إنو اليوم احنا ثالث ثانوي .. واحنا ممدانا داخلين الثانوي ، الوقت يمشي بسرعة .. حتى ما يخلي الواحد يفكر ، ويعيد حساباته أحياناً .. يشوف هل تغير ولا لا ؟ هل أنجز ولا لا ؟

الله يمضي هـ السنة ع خير ، وإن شاء الله تكون سنة سعيدة وخفيفة .. ويارب يسهل عليكم و يوفقكم

كل سنة وأنتو طيبين ()

ومن العايدين الفايزين إن شاء الله ..

بسرعة خلص الشهر سبحان الله ، كيف أمس كنا نستناه والحين نودعه .. راح نفقد أجوائه وراح نفقد خواطر واليابانيين الي يفطرون معانا كل يوم ،

من زمان عن هـ المكان وعنكم وعن كل شي .. إنشغلنا بالشهر الفضيل الله يعيده علينا أعوام عديدة ،

كلام يتكرر كثير ، العيد ماهو العيد .. والناس ماهي الناس ،!

ما حسيت إن اليوم فعلاً ” عيد ”  إلا بالفجر .. ،

ولا حسيت بفرحة العيد إلا يوم حبيت راس جدتي ويدها ، وجودها بهالعيد كسر روتين أعياد الفطر الي كانت كثير تمر بدونها ،

ويمكن يوم كنت ألعب مع البنات الصغار لا جيت أمدح لبس الأولى تجي الثانية تقول شوفي لبسي ..

بهالمواقف هذي  فقط حسيت  إن هـ اليوم يوم مختلف ، أما باقي اليوم .. كنت أحس إنه كأي يوم عادي ، أو أقل بعد .. :/

كنت أبي ناس فهالعيد بس للأسف مو موجودين .. يمكن لو كانوا فيه كنت فرحت وانبسطت ، بس الشكوى لله : (

ما أبي أحكي كثير عن هـ العيد ، لأني خلقه أحب عيد الأضحى أكثر من الفطر .. بحكم إن كل الناس الي أحبهم موجودين ، وفي الشتاء ..

وتظل أعياد أول هي الي غير .. مستحيل يجي شي يشابهها أبداً ،  

بس الحمدلله إن فيه شي اسمه ذكرى .. !

وكل عام وأنتم  بخير مره ثانية  ()

http://www.youtube.com/watch?v=vWuCC3Q-Jb4

مبارك عليكم الشهر .. والله يعيده علينا أعوام عديدة وحنا بصحة وعافية وأمان ،

رَمضان هدية من رب العالمين .. باب من أبواب السماء ..أوسع مما نتخيل ،

فرصة نجدد إيمانياتنا ، و أمانينا بعد .. : )

و الحمدلله الي أعاده علينا .. والله يرحم الي ما لحق عليه ،

 لو بسوي دعاية لشي في التلفزيون في رمضان ..خواطر طبعاً  ،

وبرنامج عن السيرة لنبيل العوضي جذبني طريقة عرضه ، أتوقع شفته في الشارقة..

أما المسلسلات .. فـ أقولكم من الحين إحساسي يقول إن أغلبها ماصل -> أهم شي إحساسك

و رَمضانكم  كَريم ، ولا تنسونا من دعواتكم في الصلاة .. ()

دايماً أتخيل إني لو يحصل لي مره أنتحل شخصية أحد ، وأقعد أشوفني ..  بس بناظر كيف الناس يناظروني أو وش يحسون لمن يناظروني ويتكلمون معي بالتفصيل الممل !

مررره أحسها متعة فظييييييعة : P   ،

أنا عارفة نفسي كويس .. بس أعرفني مع جوا أكثر من إني أعرفني مع برا صراحةً،

يعني ما أعتمد على أحد في معرفة ذاتي – ولله الحمد – ، بس عندي فضول وش يشوفوني الي حولي ..

أضحححك أحياناً لمن أحد ينعتني بصفة يحسها فيني ، أو يقلدني ..

وأستغرب لمن أحد يقولي إنه لو يشوفني لأول وهلة يحس فيني نوعاً ما غرور ..

و أعرف كويس .. إن كل اختبارات تحليل الشخصية تظهر جانب بسيط من شخصك ، وغالباً تصير فيه صفات ماهي فيك بتاتاً

وهذا دليل إنو أنت هو أنت .. تختلف عن كل أحد لو هو توأمك ،

و كل أحد عنده حب لمعرفة صورته عند الي حوله .. وش تعني لهم ؟

والأهم من كذا كل أحد ييحب  الصفات السلبية الي أحيانا يسويها من غير ما ينتبه ،

طيب .. أنتو لو كنتوا تعرفوني وش تشوفوني ؟ ولو كنتوا ما تعرفوني وش تحسوني .. ؟

باختصار .. لمن يجي إسم ألوف .. وش يجي ع بالك ؟

صدمممة

توقعت إني من 96 وتحححت ..

بس الحمدلله استانست .. يعني نسبة هـ الترم أحسن من الترم الي راح ،

الحمدلله ياربي ..

by ~Loona5 

من يصدق إني خلصت ثاني ؟ :]

أنا لسا ما استوعبت كلياً ، يعني من جد أحس هـ الترم طويل بس مر بسرعة رهيبة ، لدرجة إنو ما خلاني أستوعب إني خلصت ثلثين من مشوار الثانوي ! – باقي الثلث الأخير -

أحس كل شي صار أمس ، مع إني لو أحسب الوقت ع المواقف يمكن بعضها يصير له سنتين وأنا لسا أتذكره كل يوم وكأنه شي قريب !

على إن هذي السنة هي أكثر سنوات حياتي تعاسة ، وأكثر سنة تعبتني .. بس أحسني بالنهاية تغييرت فيني أشياء كثييييرة بدون ما أحس ،

صراحةً شفت و اكتشفت وتعلمت أشيااء فـ هالسنة ، لا هو pH والـ pOHولا المتجهات ولا الأحماض والقواعد ،

اكتشفت طبايع ومعادن بعض البنات من خلال تعاملي معهم ، وناس عرفت أشياء فيهم من خلال التكهن والفراسة -> احلفي يا فراسة

وفعلاً تأكدت من هذي الصفات بأكثر من سالفة ،

وعلى أساس هـ الشي كنت أبني صداقتي وثقتي فيهم ، وحتى سوالفي معهم ، – وبعضهم ما أسولف معهم – وأكون وحدة هادية معهم ،

يعني انصدمت ببنات ، سواء كان بشي مو كويس أو شي كويس ،

أشياااااء كثير مرره مررره .. مواقف صارت لي خصوصاً هـ الترم خلتني أتوب إني أتعامل مع هـ الإنسانة مره ثانية ، وإني لازم أفتح عيوني كويس المرات الجاية !

فيه بنات تصرفاتهم تصرفات أطفال – في بعض الأحيان – ارتفع ضغغطي منها وشفت مواقف منها ، صبررررت مدة طويلة لمن خلاني أتعامل معهم بصراحة ، ويخلوني أقطها لهم بالوجه ،

والي أعرفه زين إن الأشياء الي صارت،   هبات من ربي عشان أستفيد للأيام الجاية :]

 إيش كمان ؟

خلااااص خلصنا حصص الرياضيات المدبلة ، والضغوط الي تجينا من كل حدب و صوب ،

راحت هـ السنة بكل شي فيها فرح ولا حزن .. بيصير لها ذكريات مرره حلوة رغم إننا عشنا هـ الذكريات واحنا تعبانين ،

ماراح أنسى لمن نوقف بالسيب ونشوف يمكن أبلة الرياضيات غايبة ويمن علينا ربي بـ حصتين فراغ ،

ولا حصص الفيزياء في الترم الأول .. الي قعدنا ترم كامل نحاول نفهم وش الفرق بين المتجه والقطعة المستقيمة ،

ولايوم أحاول أدخل راسي بالدرج عشان أضحك وأسوي نفسي أدور منديل – في حصة الفيزياء يوم ناخذ الدوران شي زي كذا – طبعاً كل البنات يضحكون مو بس أنا ، بس أنا احتراماً لمشاعرها غبيت وجهي وغطيت وجهي بالمنديل مره ثانية ، طبعاً هي ما تدري .. فـ تقول ليش تضحكون ، وتعيد الحركة الي تضحك ونضحك مره ثانية -بشويش طبعاً – ، حتى يوم سألنا الفصول الثانية صارت مسوية لهم نفس الحركة وصارت هذيك السالفة سالفة بنات العلمي هذاك اليوم ! > وشي  الحركة طيب ؟  تعرفون بالأفلام المكسيكية لمن أحد يمسك الحبل ويقعد يدور فيه عشان يمسك أحد .. كذا الأبلا كانت تسوي وضابطة الدور مررره ،

وش بعد ؟

ما راح أنسى أيام تفاعل البنات مع غزة وكيف كانوا متأثرين ولا أنسا التبرعات الي نجمعها ،

ما أنسى أيام الشتا  ولا أنسى المطر القوي الي جا .. ولا الغبارالعنيف ،

وما أنسى بعد يوم نهج قبل كم أسبوع ، وأرز نفسي مع بنات الأدبي عشان ما أشكك بنفسي وأنزل أدور معهم تحت وأستذكر أيام المتوسط حيث إني قطعت الهج من سنتين إلا شهر !

وما أنسا كمان دورة تحديد المصير ، الي خلتنا نعزز أهدافنا بقوة ،

أشياء كثيرة حصلت فـ هالسنة ، ما أقدر أسترجعها أو أستذكرها الحين ،

الي أعرفه كمان إني عرفت بناات أفتخر إني أعرفهم والله ، – من ثاني وثالث -

وش بعد ؟

أحب بنات فصلي 2ع3 .. من رقم 1 إلى 37 كلكم ناس كويسين وتهبلون ،

والي يقول إن احنا ناس عجازين ومظاهر وإنا داخلين العلمي بس عشان المظهر ، راح نثبت له إن أحنا أحسن ناس ،

يكفي إننا صبرنا على الغثا الي جانا ، وهذي أكبر شهادة ،

أحب الأدبي كلهم .. ناس متعاونة مع بعض وقلوبهم على بعض ، وياما وياما جو واستهبلوا بالحصص الأخيرة ووسعوا صدورنا ،

كانت أيام جَميلة ،

حبيت هـ السنة ، وحبيت مدرستي الجَميلة الرابعة ،

وأهم شي إني حبيتني أنا .. : P

وإقااازة سعيدة للكل :]

^

يشبه لي صح ..؟ :/

تدرون وش أشين شي في الحياة ؟

لمن تبذل جهد ولا تلقى نتيجة مرضية ، لمن يصيرون الناس أنانيين تجاهك .. ، لمن أحد يأنبك بشي يخصك أنت ما يخصهم ويشككونك بنفسك ويحاولون يخلونك تعيد ترتيباتك من جديد ، وهم أصلاً ما جابوا خبرك .. يفكرون بأنفسم بالنهاية ،

صراحةً من كثر ما كرهت نفسي ، أو بالأحرى من كثر ما كرهوني الناس بنفسي ..

صارت النتيجة عكسية ، صرت أطنش ، ما أكترث للأخطاء – نسبياً – ، صرت أعصب بسرعة وأحس كل الناس ضدي ، وزيادة ع كذا أحسني مضغوطة ع آخر درجة وودي أنفجر :/

هـ الترم  تقريباً في بدايته كنت أعيش هـ الحالة يومياً : ( ،

ضغوط نفسية ودراسية ، تأدية واجبات مفروضة عليك كشخص ، و أشياء كثيرة ملزومة فيها .. !

طبعاً كل هـ الأشياء الي صارت مصدرها بالنهاية المدرسة لا غير ، مستحيل المدرسة تنفصل عن حياتي اليومية ،

على أساسها يجري التقييم لشخصي .. إذا كنت متغيرة أولا !

مو أنا أصلاً كل اليوم فيها من 7 إلى 12:30  والباقي نصه رايح للنوم والمذاكرة !

في البداية كان مرره يضيق صدري إذا نقصت درجة أو نص الدرجة ، ولمن أقول لأهلي ع طول يجي الرد إني أسوف وأطنش وأخلي الواجبات بالنهاية ،

يعني بالعربي شخص ما عنده أولويات ، :/

وياما أمي قالت لي إني متغيرة عن أولى ، ما أدري إن كان الشخص يقيم على دفارته ، أو إن النسبة والشطارة تقيم على كم الساعات الي أذاكر فيها ..

وطبعاً يجيها الرد المختصر : أنا أعرف نفسي وأعرف كيف أذاكر شوفي الترم الثاني من أولى ما أقعد إلا نص ساعة مذاكرة ونسبتي 99.71 % مو شرط إني أذاكر واجد !

بس لازم الإصرار يجي : لا لا أنتي متغيرة ،

بعد كذا أزيح غروري بنفسي وإني أعرف نفسي أكثر من أي أحد ، وأحاول أثبت لنفسي إني ما تغيرت وإن هذي الظروف وإن وإن وإن ..

أحياناً أرجع للبيت أخاف أصيح إذا قلت لأبوي إن أبلة الرياضيات ضاغطة علينا ما كأن فيه مواد ثانية ، لدرجة إنها تعطينا حوالي 5 أسئلة إلى 6 أسئلة بفقراتها والي يعترض يبشر بأسئلة أكثر ولو كنا ما حلينا مشابه لها وزيادة ع كذا يكون عندي امتحان دوري لمادة مهمة ثانية ،  – أنا وش أبدي عليه طيب  ، أنا إنسانة بالنهاية :”( -

أنقهر لمن تجي الحصة السابعة – الي هي المفترض تكون حصة فراغ كل يوم – وأشوفني أكرف وبنات الأدبي يسعسعون بالأسياب ، : /

أنقهر لمن تجي أستاذة تبخس حقوقنا وإذا استجدينا بالبنات الدوافير -بعضهم - عشان نقدم شكوى صاروا كلهم ” صم بكم عمي فهم لا يفقهون ” > ما أقصد الآية *

(مع العلم إن مديرتنا توقف مع الحق ومتأكدة لو تكلمنا معها راح يحذفون الحصة الإضافية زي ما سوو مع بنات العام )

مدري من وين يستوردون هـ الطاقة ، ولا الوقت .. أو شكله استعراض عضلات لا أكثر إنو احنا نقدر !!

حتى احنا نقدر ، بس احنا نبي وقت عشان نرفه عن أنفسنا نقعد مع أهالينا شوي ، ننام نومة هنيئة ونحلم أحلام سعيدة ..

من الكرف حتى وأنا أحلم أصير أحل مسائل وأذاكر .. > اللهم لك الحمد

يعني بالعربي نبي الدراسة تكون شي ممتع أكثر من أنها كرف ، وبالنهاية راح ننسى الي درسناه.. وماراح ياخذون من تعبنا إلا 30%  ،

أذكر وحدة من صديقاتي يوم طلعنا بالفسحة بعد حصة الرياضيات قعدت تصرخ : أبنتتحرررررر بطب من هنا – من عند الدرابزين الي يطل ع الساحة – هاه ألوف تنتحرين معي ؟

أنا : هههههههههههههههههههههه .. يختي والله من جد تعب ، خلااااص طفشششت :/

-وبصوت عالي وطبعاً لازم اليدين تتحرك يمين وشمال-  اممم ..بس أنا حياتي وسعادتي أثمن وأولى عندي من اختبار الرياضيات ولا الدراسة أنا أنتحر عشان دراسة !!

لمووش : أكشآآآآآآآخ يا حركات .. والله إنك صادقة :/

حسيت الرد مو ردي من وين جا ؟ حسيت قلته بالغلط !! بس عقب هذي العبارة صرت أرتب أولوياتي صح وناستي بعدين الدراسة !

هذي العبارة على ما أعتقد أجمل وأقوى عبارة قلتها فـ هالوقت ، لأنها نفعتني بجد وأسعدتني ..

تدرون وشو الشي الثاني الي يقهر ؟ > أحسني طولتها :$

إنك لازم ما تصير ع طبيعتك أو تكون صريح وصادق مع نفسك والآخرين ، يعني لازم تلبس قناع إنك تضحك دايماً ، وتنصب ع حساب راحتك ،

وياكثر البنات الي عايشين على هـ الطريقة مع بعض المعلمات ..

يله ما بقا شي ويخلص هـ الترم ، وناخذ نفس طويييييل ونشعر بالحرية

الأشياء الي تعلمتها من المدرسة فهـ الترم :

1- إنك كلما صرت منافقة ونصابة وتجاملين ، وتبتسمين لناس ما يستحقون .. اعرفي إن الشخص الي قدامك راح يعاملك كويس ! -مو الكل -

بس أنا متمردة ولا أبي أتبع هـ القانون صراحةً ،

2- إنو سعادتك هي أولى أولوياتك قبل الدراسة وقبل كل شي ..

3- الشخص لازم يعتمد على نفسة في معرفة ذاته ولا يترك للأشخاص الآخرين مجال للتشكيك بنفسه ،

4- أسلوبك هو أسلوبك ، مو الناس الي تقترح عليك كيف تذاكر ، الشي الي تعودت عليه هو الي تمشي عليه ، زيي أنا أحب أذاكر كل مادة بيومها بدون مبالغة بالمذاكرة ..

آخر شي أنا راضية عن نفسي تمام الرضى .. وأنا بذلت جهدي وأي نسبة تجيني حياها الله ، أهم شي ما أشعر بتأنيب الضمير ،

و.. الله يوفق الجميع بالفاينلز :]

صح .. وش تعني “Dim 2.s.3 as Karrrf ” ؟

> من تأثير الدراسة واللهِ seko